بعد ما انتشرت أخبار صعوبات الحياة في سوريا قرر حاكم دبي أن يبعت وزير وزارة اللامستحيل اللي أسسها جديد لمواجهة المستحيل إلى سوريا ليتعلم كيف يواجه المستحيلات ويجرب حياة التقشف والصعوبات. وصل الوزير مكتوم ابن معصوم اللامستحيلي ع مطار الشام قام سرقولو الشبيحة الشنطة، زعل شوي لكنه قرر التحدي و متابعة المهمة، وقف عالشارع شي عشر ساعات لياخد تكسي مالاقى غير الناس راكبة عالبغال والحمير، سألهم عن السبب قالولو : شوفة عينك مافي بنزين ولا مازوت، قام الرجل قال لحالو : هدا أمر مو مستحيل لازم أواجهو بالتحدي فشمر الرجل كلابيتو وركب على جحش ورا أحد المواطنين ونزل عالشام…
وصل الرجل بعد ساعات مصمت ومهتري لكنه قال لحالو: نجحت بالاختبار الأول. بأول يوم راح ليجيب خبز أكل ستين نعرة وبعد ما ضل واقف شي 5 ساعات لأخد ربطة خبز قامت طلعت نصها مقرمدة والنص التاني محروق، قال لحالو: يلا مو مشكلة، بتتدبر بعمل شاي وبغط هالخبز بالشاي وباكل. رجع عالأوتيل ليفطر ويعمل شاي لاقى الكهربا مطفية والمي مقطوعة ..قال لحالو : يلا .بجيب شوية مي وبنقع الخبز فيهم وبمشي حالي..
بعد ما فطر قرر يطلع جولة بالباص، راح عالموقف انتظر مع شي 600 زلمة 3 ساعات لأجى الباص، طلع دركلة ودفش وانحشر ورا الباب ..صار كل مايفتح الباب ويسكر يطبق عليه..بعد 4 ساعات نزل دايخ من الباص وكلابيتو مشقشقة وعرقو وصلان لركبو..طالع موبايل الثريا تبعو ودقو للشيخ بدبي ،قالوا: سموك بتعرف أني كنت متلك أؤمن أنو مافي شي مستحيل بهالعالم لكن إذا بدك تشوف المستحيلات بالألوان تعال كم يوم ع سوريا وشوف قديش الحياة كلها مستحيلة! المهم، الوزير رجع ع دبي وصار وزير “الحياة السورية” وهي وزارة أنشاتها دبي لتعاقب المجرمين على الجرائم الخطيرة اللي ارتكبوها قبل ما تبعتهم عالحبس!
ماهر حمصي