هي الكذبة تبع المهم ضليتوا عايشين..والمهم بقاء البشر والحجر مقدور عليه..وشوفوا مصايب غيركن مشان تهون عليكن مصيبتكن.. مع احترامي هادا كلو علاك!!!
البشر بدها حجر لتتآوى.. والحجر بيتأنسن بالبشر وبدون الناس بصير الحجر وحش مفترس.
ومافي مصيبة اهون من مصيبة ابدا..وكل مين مصيبته بتوجعه وبتهلكو وبتستهلك طاقته.
العيشة مشردين وجوعانين وبردانين هي مو عيشة..ولا حتى بتشبه عيشة الكلاب.. لانو الكلاب بتلاقي اكلها وبتقدر تتدفى وتتآوى..
حطوا عيونكن بعيون الناس وأمنولها احتياجاتها..اتركولها حصتها من المساعدات..مافي إمكانية للناس بهيك وضع تقدر ترمم ولو شباك.ومافي امل انو الناس ما تتوحش وولادها بردانين وجوعانين ومذلولين.
والزعبرة انو نحنا جبارين وقادرين هي كذبة وخيلة من تفاهات ومساخر الحرامية والناهبين. الحقيقة نحنا مجبورين نعيش بالموجود ومو طالع بايدنا شي..بس بالحقيقة نحنا عم نموت مية موتة..وروحنا عم تطقطق وعآخر نفس..
الظاهر خلص وقت الخبر اللايف والصور والشعارات والندب والشحادة علينا.
لانو صار وقت اللهط والهف والسرقة والسلبطة عكلشي حتى عالردم تبع بيوتنا.. كترت الدعوات تبع ترميم الذات والمقدرات الخرندعية الوهمية..
تركونا نموت لحالنا.. وجودكن بيخنقنا.. ريحتكن مقززة وكلامكن بيهد قلوبنا ..
ولو فيكن تسرقوا الأكفان ما بتقصروا…
ماعاد تضحكوا علينا وتقولوا جبارين…نحنا بشر..نحنا تعبنا..نحنا فرطنا. والطاقة يلي ضلت عايزينها مشان نموت بسلام او نودع أحبتنا بغمرة او بكلمة حب..
حتى الضو يلي بعيوننا سرقتوه..وصار غاية رجاءنا انو نموت عالهدا..عالهدا وبسلام الحملان يلي تعودت عسكين الدبح..
ماهر حمصي